Gjykata Themelore e Prishtinës rrëzon aktakuzën ndaj pronarit të Spitalit Amerikan dhe të tjerëve: Mungesë provash për falsifikim dhe shpëlarje parash

Gjykata Themelore e Prishtinës ka hedhur poshtë aktakuzën e ngritur nga Prokuroria Speciale kundër pronarit të Spitalit Amerikan, Klodian Allajbeu, pronarit të Qendrës Kardiake të Kosovës, Ekrem Lluka, dhe disa të akuzuarve të tjerë, lidhur me veprat penale të falsifikimit të dokumenteve dhe shpëlarjes së parave.

Sipas vendimit të gjykatës, aktakuza nuk përmban prova të mjaftueshme për të dëshmuar se veprat penale janë kryer nga të pandehurit. Gjykata theksoi se dokumentet e konsideruara si të falsifikuara janë nënshkruar nga persona të autorizuar dhe nuk përmbajnë ndërhyrje që do të përbënin elementet e veprës penale të falsifikimit, sipas Kodit Penal të Republikës së Kosovës (neni 390).

“Vepra e shpëlarjes së parave nuk mund të ekzistojë pa një vepër paraprake penale të provuar. Prokuroria ka aplikuar gabimisht Kodin Penal të vitit 2019 për vepra të supozuara të kryera në vitet 2014-2015, kur ishte në fuqi Kodi i vitit 2012, më i favorshëm për të pandehurit”, thuhet në arsyetimin e Gjykatës.

Gjykata sqaroi më tej se dokumenti i rremë ekziston vetëm kur lëshohet në emër të një personi që nuk e ka përpiluar atë apo që nuk ekziston fare, ndërsa në këtë rast dokumentet ishin nënshkruar nga persona të autorizuar, edhe nëse përmbajtja e tyre mund të jetë e pavërtetë.

Për sa i përket akuzave për pastrim parash, Gjykata vuri në dukje se Prokuroria nuk ka sqaruar me argumente se cilat shuma parash janë përfituar në mënyrë të paligjshme, nga kush, dhe ku saktësisht janë pastruar ato. Po ashtu, mungojnë të dhënat për transfere konkrete apo xhirollogari të lidhura me veprat penale të pretenduara.

“Pretendimet e Prokurorisë mbeten në suaza të supozimeve, pa u mbështetur në prova të pakontestueshme”, thuhet në aktvendim, ku shtohet se asnjë nga veprimet e akuzuara nuk ka rezultuar me ndonjë ndëshkim, qoftë edhe administrativ.

Në fund, Gjykata vendosi pushimin e procedurës penale për të gjithë të akuzuarit, për shkak të mungesës së provave dhe mangësive serioze në aktakuzën e Prokurorisë.

Ky vendim nënvizon edhe një herë rëndësinë e saktësisë ligjore në ndërtimin e aktakuzave penale, veçanërisht kur bëhet fjalë për çështje me profil të lartë dhe me ndikim publik.